వీవోఏ-ఐకెపి కార్మికుల సమస్యలు వెంటనే పరిష్కరించాలి
ప్రభుత్వం ఇచ్చిన హామీలను అమలు చేయాలి: సీపీఐ డిమాండ్
పినపాక, జూన్ 1 (ఆధాబ్ న్యూస్): వీవోఏ-ఐకెపి కార్మికుల న్యాయమైన డిమాండ్లను రాష్ట్ర ప్రభుత్వం వెంటనే పరిష్కరించాలని సీపీఐ నాయకులు డిమాండ్ చేశారు. పినపాక ఐకెపి కార్యాలయం ఎదుట వీవోఏ-ఐకెపి కార్మికులు చేపట్టిన సంయుక్త రిలే నిరాహార దీక్షలను సీపీఐ నాయకులు సందర్శించి తమ సంపూర్ణ మద్దతు ప్రకటించారు.
ఈ సందర్భంగా సీపీఐ జిల్లా కౌన్సిల్ సభ్యులు గడ్డం మనోహరాచారి, పత్తిపాటి నాగేశ్వరరావు మాట్లాడుతూ, వీవోఏలు అనేక సంవత్సరాలుగా గ్రామీణ ప్రాంతాల్లో ప్రభుత్వ సంక్షేమ పథకాల అమలులో కీలక పాత్ర పోషిస్తున్నారని పేర్కొన్నారు. గతంలో జీతాల పెంపు కోసం ఆందోళనలు జరిగిన సమయంలో, కాంగ్రెస్ పార్టీ అధికారంలోకి వస్తే వీవోఏలకు నెలకు రూ.20 వేల కనీస వేతనం కల్పిస్తామని ప్రస్తుత ముఖ్యమంత్రి రేవంత్ రెడ్డి హామీ ఇచ్చారని గుర్తు చేశారు.
అయితే అధికారంలోకి వచ్చిన తర్వాత కూడా ఆ హామీల అమలులో పురోగతి కనిపించడం లేదని ఆవేదన వ్యక్తం చేశారు. రాష్ట్రవ్యాప్తంగా వీవోఏలు చేపడుతున్న ఆందోళనలు పూర్తిగా న్యాయమైనవేనని పేర్కొంటూ, వారికి కనీస వేతనం, ఉద్యోగ భద్రత, బీమా సౌకర్యం తదితర డిమాండ్లను వెంటనే పరిష్కరించాలని ప్రభుత్వాన్ని కోరారు.
ప్రస్తుతం ప్రభుత్వం అందిస్తున్న గౌరవ వేతనం జీవన వ్యయాలకు ఏమాత్రం సరిపోవడం లేదని, నిత్యావసర వస్తువులు, గ్యాస్, పెట్రోల్, డీజిల్ ధరలు విపరీతంగా పెరగడంతో సామాన్య కుటుంబాలు తీవ్ర ఇబ్బందులు ఎదుర్కొంటున్నాయని అన్నారు. ప్రభుత్వం సానుకూలంగా స్పందించి వీవోఏ-ఐకెపి కార్మికుల సమస్యల పరిష్కారానికి చొరవ చూపాలని డిమాండ్ చేశారు.
వీవోఏల ఆందోళనలకు సీపీఐ, ఏఐటీయూసీ సంపూర్ణ మద్దతు ఉంటుందని నాయకులు స్పష్టం చేశారు.
ఈ కార్యక్రమంలో సీపీఐ పినపాక మండల కార్యదర్శి తోగటి కుమార్, సీపీఐ సీనియర్ నాయకుడు పద్మనాభరాజు, మండల సహాయ కార్యదర్శి కప్ప వెంకటేశ్వర్లు, మన్యం ఐలయ్య తదితరులు పాల్గొన్నారు.
