రెండో రోజు ఉత్సాహంగా జర్నలిస్ట్ కప్ క్రికెట్ పోటీలు
పినపాక, ఆధాబ్ న్యూస్
పినపాక ప్రెస్ క్లబ్ ఆధ్వర్యంలో ఎల్చిరెడ్డిపల్లి క్రికెట్ గ్రౌండ్‌లో నిర్వహిస్తున్న జర్నలిస్ట్ కప్ క్రికెట్ టోర్నమెంట్ రెండో రోజు పోటీలు ఉత్సాహభరితంగా సాగాయి. ఈ సందర్భంగా మణుగూరు ఎక్సైజ్ సీఐ రాజిరెడ్డి, ఎస్ఐలు సురేష్, నాగుల్ మీరా గౌరవ అతిథులుగా హాజరై ఆటల్లో పాల్గొని ప్రేక్షకులను అలరించారు.
ఈ సందర్భంగా వారు మాట్లాడుతూ జర్నలిస్టులు, అధికారులు, ప్రజాప్రతినిధుల మధ్య ఐక్యతను పెంపొందించడం, క్రీడా స్ఫూర్తిని ప్రోత్సహించడం లక్ష్యంగా నిర్వహిస్తున్న ఈ టోర్నమెంట్ అభినందనీయమని తెలిపారు. పోటీలు ప్రేక్షకులను ఆకట్టుకుంటున్నాయని, క్రీడాకారులు క్రీడాస్ఫూర్తితో ఆడి విజయం సాధించాలని సూచించారు. టోర్నమెంట్‌ను విజయవంతంగా నిర్వహిస్తున్న కమిటీకి అభినందనలు తెలిపారు.
రెండో రోజు జరిగిన మ్యాచ్‌లలో పినపాక ప్రజాప్రతినిధులు – కరకగూడెం జర్నలిస్టుల మధ్య జరిగిన మ్యాచ్‌లో కరకగూడెం జర్నలిస్టులు విజయం సాధించారు. ఉపాధ్యాయులు – బిటిపిఎస్ జెపిఎ జట్ల మధ్య జరిగిన మ్యాచ్‌లో బిటిపిఎస్ జెపిఎ జట్టు గెలుపొందింది. పినపాక పోలీస్ – కరకగూడెం ఎంపీడీవో కార్యాలయ జట్ల మధ్య జరిగిన మ్యాచ్‌లో పోలీస్ జట్టు విజయం సాధించింది. ఎక్సైజ్ విభాగం – పినపాక ఎంపీడీవో జట్ల మధ్య జరిగిన మ్యాచ్‌లో పినపాక ఎంపీడీవో జట్టు గెలిచింది.
కరకగూడెం ప్రెస్ క్లబ్ కెప్టెన్ దుర్గం ప్రేమ్ కుమార్ ఆధ్వర్యంలో నిర్వహించిన ఈ పోటీలలో సురేష్, ప్రవీణ్, సురేందర్, రంజిత్, దిలీప్, హనుమంతరావు, ప్రవీణ్ ఫరూఖ్ అత్యుత్తమ ప్రతిభ కనబరిచి మ్యాన్ ఆఫ్ ద మ్యాచ్ అవార్డులు అందుకున్నారు. అతిథులు విజేతలకు బహుమతులు అందజేశారు.
