అన్నాచెల్లెళ్ల అనుబంధానికి రక్షాబంధన్‌ వేడుక
రాఖీతో వెల్లివిరిసిన ప్రేమానురాగాలు.. మండల వ్యాప్తంగా సందడి
కరకగూడెం, ఆగస్టు 28 (ఆధాబ్ న్యూస్): చిన్ననాటి అల్లరిని గుర్తుచేస్తూ.. ఎన్నో మధుర జ్ఞాపకాలను నెమరువేసుకుంటూ.. అన్నాచెల్లెళ్లు, అక్కాతమ్ముళ్ల మధ్య ప్రేమానురాగాలను మరింత బలపరిచే రక్షాబంధన్‌ పండుగను కరకగూడెం మండల వ్యాప్తంగా ప్రజలు ఆనందోత్సాహాలతో జరుపుకున్నారు. రాఖీ కట్టే సమయంలో సోదరి కళ్లలో కనిపించే ఆప్యాయత.. సోదరుడి ముఖంలో కనిపించే ఆత్మీయతతో గ్రామాల్లో పండుగ వాతావరణం నెలకొంది. 
రక్షాబంధన్‌ సందర్భంగా తెల్లవారుజాము నుంచే సోదరీమణులు ప్రత్యేకంగా సిద్ధమై తమ సోదరుల ఇళ్లకు చేరుకున్నారు. రంగురంగుల రాఖీలను తీసుకువచ్చి సోదరుల చేతికి కట్టి, నుదుటన తిలకం దిద్ది, హారతి ఇచ్చి వారి క్షేమాన్ని ఆకాంక్షించారు. అనంతరం స్వీట్లు తినిపించి తమ ప్రేమను చాటుకున్నారు. సోదరులు కూడా తమ సోదరీమణులకు బహుమతులు అందిస్తూ జీవితంలోని ప్రతి అడుగులో అండగా ఉంటామని భరోసా ఇచ్చారు.
శ్రావణ మాస పౌర్ణమి సందర్భంగా జరుపుకునే ఈ పండుగకు ప్రత్యేకమైన ప్రాధాన్యత ఉంది. రాఖీ అనేది కేవలం ఒక దారం కాదని.. అన్నాచెల్లెళ్ల మధ్య ఉన్న అనుబంధం, నమ్మకం, బాధ్యతలకు ప్రతీక అని పలువురు పేర్కొన్నారు. చిన్నతనంలో కలిసి ఆడుకున్న రోజులు, ఒకరితో ఒకరు చేసిన అల్లరి, చిన్నచిన్న తగాదాలు, ఆ తర్వాత మళ్లీ కలిసిపోయిన సందర్భాలు రక్షాబంధన్‌ వేళ ప్రతి ఒక్కరికీ మధుర జ్ఞాపకాలుగా మారాయి.
ఉద్యోగాలు, చదువులు, వివాహాల కారణంగా దూర ప్రాంతాల్లో ఉంటున్న సోదరులు, సోదరీమణులు సైతం ఈ పండుగ కోసం స్వగ్రామాలకు చేరుకోవడంతో కుటుంబాల్లో సందడి నెలకొంది. కొందరు రాలేని పరిస్థితుల్లో ఫోన్‌, వీడియో కాల్స్‌ ద్వారా ఒకరికొకరు శుభాకాంక్షలు తెలుపుకున్నారు. మరికొందరు పోస్టు, కొరియర్‌ ద్వారా ముందుగానే రాఖీలు పంపించుకుని తమ అనుబంధాన్ని చాటుకున్నారు.
కాలం మారుతున్నా.. కుటుంబ వ్యవస్థలో ఎన్నో మార్పులు వస్తున్నా.. అన్నాచెల్లెళ్ల బంధానికి మాత్రం ఎప్పటికీ ప్రత్యేక స్థానం ఉంటుంది. కష్టసమయంలో తోడుగా నిలవడం, సంతోషంలో భాగస్వామ్యం కావడం, ఒకరి విజయాన్ని మరొకరు మనస్ఫూర్తిగా కోరుకోవడం ఈ బంధం ప్రత్యేకత. అందుకే రక్షాబంధన్‌ ప్రతి ఏడాది వచ్చినప్పుడల్లా బాల్య జ్ఞాపకాలను మళ్లీ గుర్తుచేస్తూ కుటుంబ సభ్యుల మధ్య ప్రేమను మరింత పెంచే పండుగగా నిలుస్తోంది.
మండలంలోని పలు గ్రామాల్లో సోదరీమణులు తమ సోదరులకు రాఖీలు కట్టి ఆశీర్వదించగా.. సోదరులు కూడా బహుమతులు అందించి వారి పట్ల తమకున్న ప్రేమను వ్యక్తం చేశారు. దీంతో కరకగూడెం మండల వ్యాప్తంగా ఎక్కడ చూసినా రాఖీల సందడి, ఆత్మీయ పలకరింపులు, కుటుంబ సభ్యుల ఆనందంతో పండుగ వాతావరణం కనిపించింది.
