భద్రాచలం ఎమ్మెల్యే కారును ఢీకొట్టిన లారీ.. తృటిలో తప్పిన ప్రమాదం
ఆధాబ్ న్యూస్, భద్రాచలం ఆగస్టు 6:
భద్రాచలం ఎమ్మెల్యే తెల్లం వెంకట్రావు ప్రయాణిస్తున్న కారు గురువారం రాత్రి రోడ్డు ప్రమాదానికి గురైంది. భద్రాచలం నుంచి హైదరాబాద్కు వెళ్తుండగా యాదాద్రి భువనగిరి జిల్లా పంతంగి టోల్గేట్ సమీపంలో వేగంగా వచ్చిన లారీ ఎమ్మెల్యే ప్రయాణిస్తున్న కారును ఢీకొట్టింది.
ఈ ప్రమాదంలో కారు ఒకవైపు పూర్తిగా దెబ్బతినగా, ఎమ్మెల్యే తెల్లం వెంకట్రావు సురక్షితంగా బయటపడ్డారు. ప్రమాదం జరిగిన వెంటనే స్థానికులు, అనుచరులు అప్రమత్తమై సహాయక చర్యలు చేపట్టారు.
ఒక్కసారిగా జరిగిన ఈ ఘటనతో ఎమ్మెల్యే స్వల్ప అస్వస్థతకు గురైనట్లు సమాచారం. అయితే ఆయనకు ఎలాంటి తీవ్ర గాయాలు కాకపోవడంతో అందరూ ఊపిరి పీల్చుకున్నారు.
ఈ ఘటనపై సమాచారం అందుకున్న పోలీసులు సంఘటనా స్థలానికి చేరుకుని ప్రమాదానికి గల కారణాలపై విచారణ చేపట్టారు. పెను ప్రమాదం తృటిలో తప్పడంతో ఎమ్మెల్యే అనుచరులు, కార్యకర్తలు ఊరట వ్యక్తం చేశారు.
