రైస్ మిల్లులో 6,300 క్వింటాళ్ల బియ్యం మాయం!
ఎన్ఫోర్స్‌మెంట్ అధికారుల తనిఖీల్లో భారీగా తేడా.. పోలీసులకు ఫిర్యాదు
మిల్లు నిర్వాహకులపై కేసు నమోదు.. అరెస్ట్ చేసి రిమాండ్‌కు తరలించిన పోలీసులు
అశ్వాపురం, సెప్టెంబర్ 1 (ఆధాబ్ న్యూస్): అశ్వాపురం మండలంలోని ఓ రైస్ మిల్లులో భారీగా బియ్యం తేడా బయటపడింది. గత నెల 5వ తేదీన ఎన్ఫోర్స్‌మెంట్ అధికారులు నిర్వహించిన తనిఖీల్లో సుమారు 6,300 క్వింటాళ్ల బియ్యం తక్కువగా ఉన్నట్లు గుర్తించినట్లు సమాచారం.
మిల్లులోని బియ్యం నిల్వలు, రికార్డులను అధికారులు పరిశీలించగా లెక్కల్లో భారీ వ్యత్యాసం ఉన్నట్లు గుర్తించారు. దీంతో ఈ వ్యవహారంపై ఎన్ఫోర్స్‌మెంట్ అధికారులు పోలీస్‌స్టేషన్‌లో ఫిర్యాదు చేశారు.
ఫిర్యాదు ఆధారంగా పోలీసులు మిల్లు నిర్వాహకులపై క్రిమినల్ కేసు నమోదు చేసి దర్యాప్తు చేపట్టారు. అనంతరం మిల్లు నిర్వాహకులను అదుపులోకి తీసుకున్న పోలీసులు అరెస్ట్ చేసి కోర్టులో హాజరుపరిచారు. కోర్టు ఆదేశాల మేరకు వారిని రిమాండ్‌కు తరలించినట్లు సీఐ ఎల్లయ్య తెలిపారు.
భారీ మొత్తంలో బియ్యం నిల్వల్లో తేడా రావడంపై అధికారులు, పోలీసులు దర్యాప్తు కొనసాగిస్తున్నారు. ఈ వ్యవహారంలో మరిన్ని వివరాలు దర్యాప్తులో వెలుగులోకి వచ్చే అవకాశం ఉంది.
