రవిచంద్ర మృతి ఘటనపై సమగ్ర విచారణ చేపట్టాలి
బాధ్యులను గుర్తించి కఠినంగా శిక్షించాలి: తుడుందెబ్బ జిల్లా ప్రధాన కార్యదర్శి పోలేబోయిన వెంకటనారాయణ
కరకగూడెం, అక్టోబర్ 12 (ఆధాబ్ న్యూస్):
భద్రాద్రి కొత్తగూడెం జిల్లా కరకగూడెం మండలం కలవలనాగారం గ్రామానికి చెందిన యువకుడు భాదావత్ రవిచంద్ర మృతి ఘటనపై సమగ్ర, నిష్పక్షపాత విచారణ చేపట్టి, ఘటనకు బాధ్యులుగా తేలిన వారిని గుర్తించి చట్టప్రకారం కఠినంగా శిక్షించాలని తుడుందెబ్బ భద్రాద్రి జిల్లా ప్రధాన కార్యదర్శి పోలేబోయిన వెంకటనారాయణ డిమాండ్ చేశారు.
ఈ సందర్భంగా ఆయన మాట్లాడుతూ.. యువకుడి మృతి ఘటనలో నిజానిజాలు వెలుగులోకి రావడంలో జాప్యం జరగడం, బాధిత కుటుంబానికి న్యాయం అందకపోవడం ఆమోదయోగ్యం కాదన్నారు. రవిచంద్ర మృతి వెనుక ఉన్న వాస్తవాలను పూర్తిస్థాయిలో వెలికితీసి, ఘటనకు సంబంధించిన ప్రతి అంశాన్ని పోలీసులు లోతుగా పరిశీలించాలని కోరారు.
ఎలాంటి ఒత్తిళ్లకు తలొగ్గకుండా సాక్ష్యాధారాల ఆధారంగా విచారణ జరిపి, బాధ్యులను గుర్తించాలని అన్నారు. అవసరమైన సాక్ష్యాలను సేకరించి, సాక్షుల వాంగ్మూలాలను నమోదు చేయడంతో పాటు పోస్టుమార్టం నివేదిక, ఇతర ఆధారాలను సమగ్రంగా పరిశీలించాలని కోరారు.
పలుకుబడి ఉన్నవారైనా, సామాన్యులైనా చట్టం ముందు అందరూ సమానమేనని వెంకటనారాయణ పేర్కొన్నారు. యువకుడి మృతి ఘటనను సాధారణ విషయంగా తీసుకోకుండా బాధిత కుటుంబానికి న్యాయం జరిగేలా అధికారులు చర్యలు చేపట్టాలని డిమాండ్ చేశారు.
విచారణ పారదర్శకంగా సాగేందుకు బాధిత కుటుంబానికి భద్రత కల్పించాలని, కేసు పురోగతిపై కుటుంబ సభ్యులకు ఎప్పటికప్పుడు సమాచారం అందించాలని సంబంధిత అధికారులను కోరారు. రవిచంద్ర మృతి ఘటనపై నిష్పక్షపాత విచారణ జరిపి, బాధ్యులుగా తేలిన వారిపై చట్టపరమైన చర్యలు తీసుకునే వరకు తుడుందెబ్బ బాధిత కుటుంబానికి అండగా ఉంటుందని తెలిపారు.
ఆదివాసీల ప్రాణాలకు, హక్కులకు రక్షణ కల్పించాల్సిన బాధ్యత ప్రభుత్వంపై ఉందని, బాధిత కుటుంబానికి న్యాయం జరిగేలా జిల్లా పోలీసు ఉన్నతాధికారులు తక్షణమే స్పందించాలని తుడుందెబ్బ జిల్లా ప్రధాన కార్యదర్శి పోలేబోయిన వెంకటనారాయణ కోరారు.
