కరకగూడెం మండలంలో ఘనంగా వినాయక సంబరాలు
లడ్డూ వేలంపాటల్లో భక్తుల ఉత్సాహం.. పోటాపోటీగా వేలం
కొత్తూరులో రూ.46 వేలు.. మోతెలో రూ.30,116కు లడ్డూలు సొంతం
కరకగూడెం, సెప్టెంబర్ 24 (ఆధాబ్ న్యూస్): కరకగూడెం మండలంలోని పలు గ్రామాల్లో వినాయక చవితి వేడుకలు, నిమజ్జన కార్యక్రమాలు భక్తిశ్రద్ధలతో ఘనంగా నిర్వహించారు. కొత్తూరు, అనంతారం, మోతె, ముత్తారం, శ్రీరంగాపురం, గొల్లగూడెం గ్రామాల్లో గణనాథుడికి ప్రత్యేక పూజలు నిర్వహించి, అనంతరం లడ్డూ వేలంపాటలు ఉత్సాహంగా నిర్వహించారు.
కొత్తూరు గ్రామంలో వివేకానంద యూత్ ఆధ్వర్యంలో నిర్వహించిన లడ్డూ వేలంపాటలో గొగ్గల రామకృష్ణ–స్వర్ణలత దంపతులు రూ.46,000లకు వినాయకుడి లడ్డూను సొంతం చేసుకున్నారు. దీంతో గ్రామంలో సందడి నెలకొంది.
అనంతారం గ్రామంలో నిర్వహించిన లడ్డూ వేలంపాటలో సలగు బిక్షపతి రూ.26,000లకు లడ్డూను దక్కించుకున్నారు.
అదేవిధంగా మండలంలోని ఇతర గ్రామాల్లో నిర్వహించిన లడ్డూ వేలంపాటల్లో కూడా భక్తులు ఉత్సాహంగా పాల్గొన్నారు.
- మోతె గ్రామం: పి. శ్రీనివాసరెడ్డి — రూ.30,116
- ముత్తారం గ్రామం: కల్తి శ్రీకాంత్ — రూ.30,000
- శ్రీరంగాపురం గ్రామం: కుమ్మరి కుమార్ — రూ.5,116
- గొల్లగూడెం గ్రామం: దబ్బగట్ల బుచ్చయ్య — రూ.5,001
లడ్డూ వేలంపాటలు పోటాపోటీగా సాగడంతో గ్రామాల్లో పండుగ వాతావరణం నెలకొంది. లడ్డూలను దక్కించుకున్న భక్తులను గ్రామస్తులు అభినందించారు.
అనంతరం నిర్వహించిన వినాయక నిమజ్జన కార్యక్రమాల్లో యువత, గ్రామస్తులు పెద్ద సంఖ్యలో పాల్గొన్నారు. భక్తి గీతాలు, డప్పు చప్పుళ్లు, నినాదాలతో గణనాథుడికి ఘనంగా వీడ్కోలు పలికారు. ఎలాంటి అవాంఛనీయ ఘటనలు చోటుచేసుకోకుండా వేడుకలను ప్రశాంతంగా నిర్వహించారు. గ్రామాల్లోని యువత, ఉద్యోగులు, గ్రామస్తులు సమన్వయంతో వినాయక ఉత్సవాలను విజయవంతం చేశారు.
