వినాయక చవితి సందర్భంగా ఘనంగా అన్నదాన కార్యక్రమం
కరకగూడెం, సెప్టెంబర్ 19 (ఆధాబ్ న్యూస్): భద్రాద్రి కొత్తగూడెం జిల్లా కరకగూడెం మండల కేంద్రంలో వినాయక చవితి సందర్భంగా కరకగూడెం గణేష్ ఉత్సవ కమిటీ, కౌండిన్య యూత్ ఆధ్వర్యంలో అన్నదాన కార్యక్రమాన్ని ఘనంగా నిర్వహించారు.
ఈ కార్యక్రమానికి కాంగ్రెస్ పార్టీ కరకగూడెం మండల అధ్యక్షులు సయ్యద్ ఇక్బాల్ హుస్సేన్, కరకగూడెం సర్పంచ్ పోలేబోయిన సుజాత హాజరై అన్నదాన కార్యక్రమంలో పాల్గొన్నారు. భక్తులకు స్వయంగా అన్నదానం చేశారు.
ఈ సందర్భంగా ఉత్సవ కమిటీ సభ్యులు మాట్లాడుతూ, తమ ఆహ్వానం మేరకు కార్యక్రమానికి విచ్చేసిన సయ్యద్ ఇక్బాల్ హుస్సేన్, పోలేబోయిన సుజాతలకు గ్రామ ప్రజల తరఫున ప్రత్యేక కృతజ్ఞతలు తెలిపారు. వినాయక చవితి సందర్భంగా భక్తులకు అన్నదానం చేయడం సంతోషంగా ఉందన్నారు.
ఈ కార్యక్రమంలో మండల నాయకులు, కాంగ్రెస్ పార్టీ కార్యకర్తలు, గణేష్ ఉత్సవ కమిటీ సభ్యులు, గ్రామస్తులు, యువకులు, భక్తులు తదితరులు పాల్గొన్నారు.
