గణేష్ మండపాల వద్ద భద్రతా జాగ్రత్తలు పాటించాలి
భక్తి ఉత్సాహంలో భద్రతను విస్మరించొద్దు: బీఆర్‌ఎస్‌ యూత్‌ ప్రెసిడెంట్‌ గుడ్ల రంజిత్‌ కుమార్
ఆధాబ్ న్యూస్ ,కరకగూడెం: వినాయక చవితి సందర్భంగా గణేష్ మండపాల వద్ద నిర్వాహకులు, భక్తులు తప్పనిసరిగా భద్రతా జాగ్రత్తలు పాటించాలని బీఆర్‌ఎస్‌ యూత్‌ ప్రెసిడెంట్‌ గుడ్ల రంజిత్‌ కుమార్ సూచించారు. భక్తి, ఉత్సాహంలో చిన్నపాటి నిర్లక్ష్యం కూడా పెద్ద ప్రమాదానికి దారితీసే అవకాశం ఉన్నందున ప్రతి ఒక్కరూ అప్రమత్తంగా ఉండాలని కోరారు.
మండపాల్లో లైటింగ్‌, సీరియల్‌ బల్బులు, సౌండ్‌ సిస్టమ్‌ కోసం నాణ్యమైన వైరింగ్‌ను మాత్రమే వినియోగించాలని రంజిత్‌ కుమార్ తెలిపారు. విద్యుత్‌ వైర్లు బయటకు వేలాడకుండా, నీరు తగలకుండా జాగ్రత్తలు తీసుకోవాలని, ఓవర్‌లోడ్‌ కనెక్షన్లకు దూరంగా ఉండాలని సూచించారు.
అగ్ని ప్రమాదాల విషయంలో కూడా ప్రత్యేక జాగ్రత్తలు తీసుకోవాలని అన్నారు. కర్పూరం, దీపాలు, అగరబత్తులు వెలిగించే ప్రదేశాల్లో మండే వస్తువులు ఉంచకూడదని, మండపం వద్ద ఫైర్‌ ఎక్స్‌టింగ్విషర్‌ అందుబాటులో ఉంచుకోవడం మంచిదని పేర్కొన్నారు.
గణేష్ మండపాలకు పెద్ద సంఖ్యలో భక్తులు వచ్చే అవకాశం ఉన్నందున రద్దీ నియంత్రణకు వాలంటీర్లను ఏర్పాటు చేసి, క్యూలను క్రమబద్ధీకరించాలని రంజిత్‌ కుమార్ సూచించారు. భక్తులు కూడా తోపులాటకు తావులేకుండా సహకరించాలని కోరారు.
సౌండ్‌ సిస్టమ్‌ను నిబంధనలకు అనుగుణంగా, నిర్ణీత సమయాల్లో మాత్రమే వినియోగించాలని, అధిక శబ్దంతో ప్రజలకు ఇబ్బందులు కలగకుండా నిర్వాహకులు బాధ్యతగా వ్యవహరించాలని తెలిపారు.
అదేవిధంగా వర్షాల నేపథ్యంలో మండపం పైకప్పు, విద్యుత్‌ కనెక్షన్లు, జనరేటర్ల విషయంలో ముందస్తు జాగ్రత్తలు తీసుకోవాలని సూచించారు. విద్యుత్‌ పరికరాలు, వైర్లు నీటికి తగలకుండా సురక్షితంగా ఏర్పాటు చేయాలని అన్నారు.
“భక్తి ఎంత ముఖ్యమో.. భద్రత కూడా అంతే ముఖ్యం. ప్రతి గణేష్ మండపం వద్ద నిర్వాహకులు, భక్తులు అప్రమత్తంగా ఉండి ముందస్తు జాగ్రత్తలు పాటించాలి. ఎలాంటి అవాంఛనీయ ఘటనలకు తావులేకుండా వినాయక చవితి వేడుకలను ప్రశాంతంగా, సురక్షితంగా నిర్వహించాలి” అని బీఆర్‌ఎస్‌ యూత్‌ ప్రెసిడెంట్‌ గుడ్ల రంజిత్‌ కుమార్ తెలిపారు.
