ఉద్యోగాల పేరుతో రూ.8 కోట్ల మోసం.. నిందితుడి అరెస్ట్
భద్రాచలం ఆధాబ్ న్యూస్: ప్రముఖ కంపెనీల్లో ఉద్యోగాలు ఇప్పిస్తామని నమ్మించి 54 మంది నుంచి సుమారు రూ.8 కోట్లు వసూలు చేసిన కేసులో నిందితుడు కళ్యాణ్‌ను భద్రాచలం పోలీసులు అరెస్ట్ చేసి రిమాండ్‌కు తరలించారు.
ఉద్యోగాలు ఇప్పిస్తానంటూ పలువురిని నమ్మించిన నిందితుడు వారి నుంచి భారీ మొత్తంలో డబ్బులు వసూలు చేసినట్లు పోలీసుల దర్యాప్తులో తేలింది. బాధితుల నుంచి వసూలు చేసిన డబ్బును ఆన్‌లైన్ బెట్టింగ్‌లో పెట్టి కోల్పోయినట్లు విచారణలో వెల్లడైనట్లు పోలీసులు తెలిపారు.
ఉద్యోగాల పేరుతో ఎవరైనా డబ్బులు డిమాండ్ చేస్తే అప్రమత్తంగా ఉండాలని, పూర్తి వివరాలు నిర్ధారించుకున్న తర్వాతే వ్యవహరించాలని డీఎస్పీ అరుణ్ కుమార్ ప్రజలకు సూచించారు. ఉద్యోగాలు ఇప్పిస్తామని చెప్పే వ్యక్తుల మాటలు నమ్మి డబ్బులు చెల్లించి మోసపోవద్దని ఆయన విజ్ఞప్తి చేశారు.
