కేజీబీవీని సందర్శించిన ఎంపీడీవో, ఏపీఎం
కరకగూడెం, సెప్టెంబర్ 7 (ఆధాబ్ న్యూస్): కరకగూడెం మండలం బట్టుపల్లి గ్రామంలోని కస్తూర్బా గాంధీ బాలికా విద్యాలయాన్ని సోమవారం ఎంపీడీవో పి. శ్రీనివాస్, ఏపీఎం సెర్ప్ బి. వినోద్ క్రాంతి సందర్శించారు. ఈ సందర్భంగా విద్యార్థులతో మాట్లాడి పాఠశాలలో అందుతున్న సౌకర్యాలు, విద్యా బోధన తదితర అంశాలపై వివరాలు అడిగి తెలుసుకున్నారు.
ఇటీవల పంపిణీ చేసిన పాఠశాల యూనిఫామ్‌ల నాణ్యతపై విద్యార్థులను అడిగి తెలుసుకోగా, వారు సంతృప్తి వ్యక్తం చేశారు. అలాగే విద్యార్థులకు అందిస్తున్న ఆహారంలో భద్రతా ప్రమాణాలు, మెనూ వివరాలు, సబ్జెక్టుల వారీగా సిలబస్‌ తదితర అంశాలను అధికారులను అడిగి తెలుసుకున్నారు.
అనంతరం 10వ తరగతి విద్యార్థులతో తరగతి గదిలో ప్రత్యేకంగా మాట్లాడిన ఎంపీడీవో శ్రీనివాస్.. విద్యార్థులు ఉన్నత లక్ష్యాలను ఎంచుకుని, వాటిని సాధించేందుకు కష్టపడి చదవాలని దిశానిర్దేశం చేశారు. విద్యార్థులు తమ భవిష్యత్తును దృష్టిలో ఉంచుకుని చదువుపై ప్రత్యేక శ్రద్ధ పెట్టాలని సూచించారు.
ఈ కార్యక్రమంలో కేజీబీవీ ప్రత్యేక ఇన్‌చార్జి అధికారి నసీమా, జూనియర్ అసిస్టెంట్ జయంత్ తదితరులు పాల్గొన్నారు.
