భారీ వర్షాల నేపథ్యంలో ప్రజలు అప్రమత్తంగా ఉండాలి
వాగులు, వంకలు దాటొద్దు.. విద్యుత్‌ వైర్లకు దూరంగా ఉండాలి
కరకగూడెం తహసీల్దార్‌ వట్టం కాంతయ్య సూచనలు
కరకగూడెం, సెప్టెంబర్ 24 (ఆధాబ్ న్యూస్): బంగాళాఖాతంలో ఏర్పడిన అల్పపీడనం ప్రభావంతో కరకగూడెం మండలంలో రానున్న రెండు రోజుల్లో భారీ వర్షాలు కురిసే అవకాశం ఉన్నందున ప్రజలు అప్రమత్తంగా ఉండాలని తహసీల్దార్‌ వట్టం కాంతయ్య సూచించారు.
వర్షాలు కురుస్తున్న సమయంలో అత్యవసర పనులు ఉంటేనే బయటకు రావాలని కోరారు. లోతట్టు ప్రాంతాలు, చెరువులు, వాగులు, వంకల వద్దకు వెళ్లకుండా జాగ్రత్తలు తీసుకోవాలని సూచించారు. ముఖ్యంగా చిన్నారులు నీటి ప్రవాహాల వైపు వెళ్లకుండా తల్లిదండ్రులు పర్యవేక్షించాలని తెలిపారు.
వరద నీరు రహదారులపై ప్రవహిస్తున్న సమయంలో వాహనాలతో దాటేందుకు ప్రయత్నించవద్దని హెచ్చరించారు. విద్యుత్‌ స్తంభాలు, తెగిపడిన విద్యుత్‌ వైర్లకు ప్రజలు దూరంగా ఉండాలని సూచించారు.
వర్షాల కారణంగా ఎక్కడైనా ఇబ్బందులు లేదా వరద పరిస్థితులు ఏర్పడితే వెంటనే రెవెన్యూ అధికారులకు సమాచారం అందించాలని తహసీల్దార్‌ కాంతయ్య కోరారు. ప్రజల భద్రతకు అవసరమైన అన్ని చర్యలు తీసుకుంటామని ఆయన తెలిపారు.
