డీఎస్పీ భీమ్‌రెడ్డి కేసులో ఏసీబీ దూకుడు
8 మంది అనుమానిత బినామీల ఇళ్లపై ఏకకాలంలో సోదాలు
హైదరాబాద్, సెప్టెంబర్ 24 (ఆధాబ్ న్యూస్): డీఎస్పీ భీమ్‌రెడ్డి కేసు దర్యాప్తులో అవినీతి నిరోధక శాఖ (ఏసీబీ) అధికారులు దూకుడు పెంచారు. కేసు దర్యాప్తులో భాగంగా 8 మంది అనుమానిత బినామీలను గుర్తించిన ఏసీబీ అధికారులు, హైదరాబాద్‌లోని పుప్పాలగూడలో వారి నివాసాలపై ఏకకాలంలో సోదాలు నిర్వహిస్తున్నారు.
ఏసీబీ డీఎస్పీ జి. శ్రీధర్ నేతృత్వంలో ఈ తనిఖీలు కొనసాగుతున్నాయి. సోదాల్లో భాగంగా అనుమానితుల ఆస్తులు, ఆస్తులకు సంబంధించిన డాక్యుమెంట్లు, బ్యాంకు లావాదేవీలు, ఇతర ఆర్థిక వ్యవహారాలపై అధికారులు ఆరా తీస్తున్నారు.
అనుమానిత బినామీల ఇళ్లలో లభిస్తున్న పత్రాలు, ఆస్తుల వివరాలు, ఇతర ఆధారాలను ఏసీబీ అధికారులు పరిశీలిస్తున్నారు. భీమ్‌రెడ్డి కేసులో బినామీ పేర్లతో ఆస్తులు సమకూర్చుకున్నారనే కోణంలో దర్యాప్తును మరింత ముమ్మరం చేసినట్లు సమాచారం.
ప్రస్తుతం పుప్పాలగూడలో పలు ప్రాంతాల్లో ఏకకాలంలో సోదాలు కొనసాగుతున్నాయి. తనిఖీలు పూర్తయిన అనంతరం స్వాధీనం చేసుకున్న పత్రాలు, ఇతర ఆధారాలపై ఏసీబీ అధికారులు తదుపరి చర్యలు చేపట్టనున్నట్లు తెలుస్తోంది.
